15.03.2010
Utforskar kunstfag i utdanning
Ein viktig del av programmet er å kombinere vitskapleg tekstproduksjon og kunstfaglege uttrykk. (Foto: istock)
Høgskolen i Bergen har etablert eit nytt strategisk forskingsprogram i Kunstfagdidaktikk, som utforskar kunstfaglege praksisar i undervisninga.
Det nyskapande forskingsprogrammet Kunstfagdidaktikk ser på aspektar ved ulike kunstfag som teater, drama, kunsthandverk og biletkunst, musikk, dans og litteratur i undervisningssamanhengar.
Ein viktig del av programmet er å kombinere vitskapleg tekstproduksjon og kunstfaglege uttrykk.
Kunstfagdidaktikk har eit retorisk perspektiv på forsking, og utviklar dei ulike kunstformene sine undervisningspraksisar på deira eigne premissar.
– Tekst spelar ei samanbindande rolle i forskingsprogrammet. Verbalspråk og retorikk er difor ein fellesnemnar for didaktisk refleksjon i alle kunstfaga, seier leiar for forskingsprogrammet, Aslaug Nyrnes.
Involverte kunstfagmiljøet
Kunstfagdidaktikk, som er det nyaste strategiske forskingsprogrammet, vart vedtatt no i haust, og er knytt til Avdeling for lærarutdanning. Programmet fekk ein felles oppstart på eit seminar i januar.
Programmet starta som eit tverrfagleg strategisk forskingsprosjekt frå 2004 til 2008, finansiert av Norges Forskingsråd (NFR) . Under planlegginga involverte Høgskolen i Bergen miljøa rundt kunstfag, mellom anna mastergradene i musikkpedagogikk og dramapedagogikk.
– Det strategiske forskingsprogrammet bygger vidare på det nyskapande, retoriske perspektivet frå NFR-prosjektet, men famnar meir allment, fortel Nyrnes.
Internasjonal merksemd
Kunstfaga har ein lang tradisjon ved Høgskulen i Bergen. Det nye strategiske forskingsprogrammet skal markere høgskulen både nasjonalt og internasjonalt, og har mellom anna skapt merksemd i liknande fagmiljø i Skandinavia og elles i Europa.
– Vi har til dømes fått merksemd frå eit institutt i Belgia som har utvikla eit doktorgradsprogram i kunstforsking. Dei er interesserte i perspektiva vi jobbar med. Vi har og knytt til oss ei internasjonal referansegruppe med fagleg kompetanse vi kan nytte oss av, seier Nyrnes.
Søkjer om doktorgradsutdanning
I løpet av våren startar to nytilsette stipendiatar innanfor det kunstfagdidaktiske forskingsområdet. Saman med det andre forskingsprogrammet ved Avdeling for lærarutdanning, Lærarprofesjonalitet, arbeider ein nå mot ein felles søknad om doktorgradsutdanning.
Det nye forskingsprogrammet Kunstfagdidaktikk har ei sentral rolle i høgskulens arbeid for å oppnå universitetsstatus. Eit av krava frå Kunnskapsdepartementet er at utdanningsinstitusjonen viser god og stabil doktorgradsproduksjon over tid, der forskingsprogramma spelar ein viktig rolle.
Samla har Høgskolen i Bergen no fire strategiske forskingsprogram:
- Kunstfagdidaktikk
- Lærarprofesjonalitet
- Kunnskapsbasert praksis i helsefag
- Programvareutvikling for distribuerte IKT- system (DISCTECH)
Sist endret: 13.10.2010