• Tekststørrelse: a a a
  • Skriv ut

SAK 88/2008

(Ref 08/49)

VEGEN MOT UNIVERSITETSSTATUS

Føremålet med seminaret er å leggja til rette for ei brei og prinsipiell drøfting av saka.

Dokument i saka

  1. Tidlegare styresaker, m.a. sak 54/2008. Rullering av strategisk plan
  2. Sak 61/2008. Evaluering av søknader og løyving av midlar til strategiske forskingsprogram for 2008
  3. Presentasjon og innlegg på seminaret 04.11.08

Saka gjeld

Styret vedtok som ledd i sak 54/2008 å starta arbeidet med å oppnå universitetsstatus:

"Styret vedtek rullering av strategisk plan i samsvar med forslaget frå høgskoledirektøren. Planen skal gjelde frå 01.08.2008.

Styret viser til premissane i saka (m.a. med ei doktorgrad), og vedtek at prosessen fram mot å oppnå universitetsstatus blir organisert som eit prosjekt med forskingsdirektøren som prosjektansvarleg. Det skal hausten 2008 arrangerast eit styreseminar om saka.”

Premissane for vedtaket er følgjande:

”Ny strategisk plan gjeldande for 2010 – 2015, vegen mot universitetsstatus.
Det blir eit svært viktig arbeid som skal gjerast for å utvikla ny strategisk plan for perioden fram mot 2015, som inkluderer vegen mot universitetsstatus (Profesjonsuniversitetet i Bergen). Arbeidet med ny strategisk plan bør starte alt hausten 2008 slik at den kan vedtakast av styret i juni 2009 eller tidleg haust 2009. Den nye planen skal gjelde frå 01.01.10.

Arbeidet som må gjerast for å kunne søkje om universitetsstatus, er ein omfattande prosess, som vil måtte omfatte alle målområda og heile organisasjonen. Høgskoledirektøren foreslår derfor at arbeidet blir organisert som eit prosjekt med prosjektgruppe og styringsgruppe (styret). Forskingsdirektøren skal vera prosjektansvarleg, og høgskoledirektøren føreset at det vert sett av tilstrekkeleg med ressursar til arbeidet.”

I ettertid har statsråden signalisert at krava om minst 4 doktorgrader og 5 mastergrader vil oppretthaldast for å kunna søkja om universitetsstatus.

Styret har i sak 61/2008 etablert eit strategisk forskingsprogram og elles tildelt midlar til utvikling av fleire program med potensial til å utvikla seg til strategiske program. Som ledd i utlysing av midlane til strategiske forskingsprogram vart avdelingane bedne om å ta omsyn til at det på sikt bør utviklast ei doktorgrad innanfor eitt forskingsfelt ved høgskolen. Avdelingane vart derfor bedne om å ta omsyn til eksisterande mastergrader som ledd i utviklinga av programforslaga.

"Vegen mot universitetsstatus” var tema på høgskolens leiarsamling 21.-22. oktober. Rektor ved Høgskolen i Oslo, Sissel Østberg, innleia med å presentera HiO sin strategi for å oppnå universitetsstatus. Leiarsamlinga fikk elles presentert dei krava som NOKUT har sett for å kunna søkja om godkjenning av doktorgrad. Det vart og vist til døme på innvilga søknader. Leiarsamlinga diskuterte saka inngåande, og rådde til at det vert utvikla doktorgrader som parallelle løp ved alle tre avdelingane for ikkje å skapa for stor ubalanse i høgskolen.

Vurdering

Høgskoledirektøren vil no avgrensa seg til å peika på nokre premissar i saka:

  • Det vidare arbeidet må ikkje gå utover den noverande prioriterte verksemda, men utfylla og forsterka
  • Arbeidet må knytast til den pågåande kompetanseoppbygginga, m.a. framlegga til forskingsprogram
  • Arbeidet må koplast til utviklinga av ny strategisk plan
  • Arbeidet må gjennomførast innanfor forsvarleg budsjettramme. Det vil vera nødvendig med eksterne midlar

Alt dette inneber

  1. Ein varsam start, kopla til arbeidet med ny strategisk plan
  2. Konkret start 01.03.09, med førebuing i januar-februar 2009, og kopla til det vidare arbeidet med forskingsprogramma
  3. Etablering av prosjektet
    • Prosjektgruppe med t.d. slik samansetjing
      - Rektor (leiar)
      - Dekanane
      - To medlemmer frå dei tillitsvalde
      - To studentar oppnemnde av SP
      Forskingsdirektør Astrid J. Bårdgard er prosjektansvarleg
    • Styret som styringsgruppe
    • Referansegruppe

Innstilling til vedtak

  1. Styret viser til tidlegare styresaker, seminaret 04.11.08, og tek saka til vitande.
  2. Styret ber om at kvar avdeling innan 01.01.09 fremjar eitt framlegg til forskingsprogram.
  3. Styret ber om å få saka attende på møtet 28.01.09 med framlegg til
    • organisering av det vidare arbeidet
    • samansetjing (endeleg framlegg) av prosjektgruppe og referansegruppe
    • tidsplan

Nils Mæhle
høgskoledirektør


Sist endret: 30.10.2008